Publikimi dhe shpërndarja në rrjetet sociale e disa videove intime, në qendër të të cilave është kompozitori Adrian Hila, ka shkaktuar reagime të shumta nga personazhe të njohura shqiptare.
Në mesin e atyre që kanë dënuar publikisht shpërndarjen e pamjeve janë gazetari Blendi Salaj dhe ish-deputetja e Partisë Demokratike, Ori Nebiaj, të cilët kanë vënë theksin te cenimi i privatësisë dhe mënyra se si publiku po i trajton këto materiale.
Salaj, përmes një reagimi në rrjetet sociale, ka kritikuar atë që e cilëson si një lloj “poshtërimi kolektiv” të personave të përfshirë, duke theksuar se shpërndarja e pamjeve intime nuk e bën shoqërinë më të mirë.
Ai tregoi se vetë nuk ka marrë video të tilla, duke ia atribuar këtë fakt miqve të tij, të cilët kanë zgjedhur të mos i shpërndajnë materialet që u kanë mbërritur.
“Çfarëdo gabimi paçin bërë këta njerëz, askush nuk e meriton që të poshtërohet, t’i asgjësohet dinjiteti dhe personaliteti”, ka shkruar Salaj, duke shtuar se kënaqësia që mund të shkaktojë poshtërimi i një personi është shqetësuese për shoqërinë.
Gazetari ka ngritur gjithashtu pyetjen se kush vendos se kush “e meriton” një trajtim të tillë, duke bërë thirrje që njerëzit të sillen ndaj të tjerëve ashtu siç do të dëshironin të trajtoheshin vetë.
Në të njëjtën linjë ka qenë edhe reagimi i Ori Nebiaj, e cila e ka cilësuar situatën si një kalim “nga skandali në spektakël”.
Ajo ka argumentuar se problemi kryesor nuk qëndron te jeta intime e personave të përfshirë, por te mënyra se si është cenuar privatësia e tyre dhe te shpërndarja e pamjeve pa pëlqim.
