Beson Rrahmani i treti në botë për Matematikë

Nxënësi nga Përlepnica e Gjilanit, Beson Rrahmani, ka arritur një rezultat të rëndësishëm në Garën Ndërkombëtare të Matematikës së Aplikuar “AMC Applied Mathematics Competition”, duke u renditur në vendin e tretë në botë në kategorinë “Junior Primary”.

Për këtë rezultat, Rrahmani është nderuar edhe me titullin “Gold Champion”, duke u dalluar mes nxënësve pjesëmarrës nga vende të ndryshme të botës.

Në garën e kategorisë “Junior” morën pjesë mbi 1,000 nxënës, ndërsa suksesi i nxënësit nga Gjilani përbën një arritje të veçantë për të dhe për komunitetin arsimor në vend.

Në këtë rrugëtim, rol të rëndësishëm ka pasur edhe mësuesja e tij, Adriana Shala, e cila e ka mbështetur dhe përgatitur vazhdimisht për garat e matematikës.

Kontributi i saj, së bashku me mbështetjen e Shkollës Fillore “Musa Zajmi”, ka qenë pjesë e këtij suksesi, duke krijuar mundësi që talenti i nxënësit të zhvillohet dhe të prezantohet edhe në gara ndërkombëtare.

Rezultati i Beson Rrahmanit e vendos një nxënës nga Gjilani në mesin e tre më të mirëve në botë në kategorinë e tij në këtë garë ndërkombëtare të matematikës.